بسم الله الرحمن الر حيم
واجب فاتيه فوى يڠ نكهن أوليه نبى
Wajeb pateh peue nyang neukheun uleh Nabi
وا جب ايمان دوم ڬتايى ا كن نبى
Wajeb Iman dum geutanyoe akan Nabi
مثال موت يڠ تهت سا كية تافراسا
Miseue maw’ot nyang that saket ta peurasa
بتا فاتيه يڠڬوه داتڠ نفا خبر
Beuta pateh nyang goh datang neu peukhaba
أوراڠ معصية يڠ تن توبة ماتى جاهيل
Ureueng maksiet nyang tan taubat mate jahe
مثال نفڬه عذاب قبور دسيى كافر
Miseue neu peugah adeuep kubu di sikaphe
نعمت شر ڬا توهن بوكا كنن لاجو
Niekmat Syuruga Tuhan buka keunan laju
أورڠ مؤمين نبرى نعمة دالم قبور
Ureueng mukmin neubri niekmat dalam kubu
ينك أورى كسوداهن هارو هارا
Nyankeu uroe keusudahan haru hara
بتا فاتيه أورى قيامت دودى تكا
Beuta pateh uroe kiamat dudoe teuka
لاڠيت مليڠڬڠ بومى مڬنجڠ مهو بور٢
Langet meulinggang bumoe meuguncang meuhubo-hubo
بولن ڠن أورى فى ڬرهنا بنتڠ مهمبور
Buleuen ngon uroe pi gurahna bintang meuhambo
هابس ماتى بندوم سارى صفا صفا
Habeh mate bandum sare saffan safa
سوره توهن اسرافيل يوب سڠكا كلا
Suroh Tuhan Israfi yub sangka kala
لاڠيت ڠن بومى كن لى منى كا ڬسمفن
Langet ngon bumoe konle meunoe ka geusimpan هابس ماتى بندوم سارى ملينكن توهن
Habeh mate bandum sare malengkan Tuhan
تمر تورون هوجن فوتيه مأ الحيا
Teuma turon hujeuen puteh Maulhaiya
عمورفة فوله تهن يڠ منن ين صفا صفا
Umu 40 thon nyang meunan nyan saffan safa
فكاين تن بندوم تلهن دبنيه أوروق
Peukayan tan bandum teulhon dibineh uruek ها بس تيموه بندوم توبه كاتدوق٢
Habeh timoh bandum tuboeh ka teuduek-duek
موى ياواڠ بندوم تمر تن لى ماتى
Meuwoe nyawong bandum teuma tanle mate تمر نيوب سڠكا كلالى اسرافيل
Teuma neuyub sangka kalale Israfi
دومنا رعيت كا ڬحساب كفر كسا
Dumna rakyat ka geuhisap geupareksa تمر كرون كا كهمفون أو فداڠ محشر
Teuma geuron geuhimpon u Padang Masya
تمر يڠ چوك ويل ڠن أونن بن يڠ بابت
Teuma nyang cok wie ngon unun ban nyang babat عوه مهمفون دومنا رعية ڬجوك سوراة
‘Oh meuhimpon dumna rakyat geujok surat
تمر يڠ روه ڠن جاري ويل كاچيلا كا
Teuma nyang roeh ngon jaroe wie ka ceulaka تمر يڠ چوك دڠن أونن مبهڬيا
Teuma nyang cok deungon unun meubahgia
كج ڠن جهة فهول ڠن كهون سنن ۑتا
Got ngon jeuheuet phui ngon geuhon sinan nyata تمر كجيڠ دومنا عمل لم نراچا
Teuma geuceng dumna ‘amal lam neuraca
تمر يڠ فهول دوم كفالوى لم نركا
Teuma nyang phui dum geupeului lam Nuraka يڠ كهون عمل كيجيكن أسى شرڬا
Nyang geuhon ‘amai keubajikan asoe Syeuruga
ها لوس فى تهت كفدوق أتس نركا جحيم
Haloih pithat geupeuduek ateueh Neuraka Jahim تمر تجك اتس تيتى صراط المستقيم
Teuma tajak ateueh titi Shirathal Mustaqim
تأيك تاجك أتس فوجق دڠن تاترون
Taek tajak ateueh pucak deungon tatron فنجڠ تيتى سابه رواية تلهو ريبو تهن
Panyang titi saboh riwayat teulhee ribee thon
سدومنن هالوس سدوم فوتس اداة ملنتڠ
Sidumnan haloih sidom putoih adat meulinteueng تيتى هلوس لا ڬي تاجم نبك فدڠ
Titi haloih lagi tajam nibak peudeueng
كرنيا الله لدوم فنتس نابن كيلت
Karonya Allah ladom pantah naban kilat
تمر يڠ جك اتس تيتى لابن بابت
Teuma nyang jak ateueh titi le ban babat
تمر لدم نابن ڬودا كفوه لاوا
Teuma ladom naban guda geupohlawa
لدوم فنتس ناكدوم بن اڠين باوا
Ladom pantah na keudum ban angen bawa
تمر لدوم فنتس باجوة هن تهت لنجا
Teuma ladom pantah bacut han that lanja تمر لدوم بن أروڠ فلوڠ يڠ تهت چچا
Teuma ladom ban ureueng plueng nyang that caca
مهيلا ٢ لم نركا كاتسيرك
Meuhila-hila lam Neuraka ka teusireuk لدوم بودى معوى ٢ مسق ٢
Ladum budoe? meu-eue meu-eue meuseuk-meuseuk
بك حوض نبى كروڠ الكوثر دسنن فيوه
Bak hudh Nabi krueng Kalkausa disinan piyoh يڠ سيلامت أتس تيتى جمراڠ فيتروس
Nyang silamat ateueh titi jeumeurang pi troih
اسى مهت سيب سيدرى ٢ هن فوى ريواڠ
Asoe meuhat seb sidroe-droe hanpeue riwang(?) بنيه كروڠ ين كندى فيلا نابن بنتڠ
Bineh krueng nyan kande pi le naban bintang
كرنيا حق هويڠ كهندق كنن نبرى
Karonya haq ho nyang kheundak keunan neubre يڠ جيب اير ين دق فيهن لى كراه فيهن لى
Nyang jeb ie nyan deuek pi hanle grah pi hanle
سنتوك سابى تبيت هنلى روك٢ مسا
Seuntok sabe teubiet hanle rok-rok masa تلس ين تمر أورڠ مؤمن تامڠ شرڬا
Lheueh nyan teuma ureueng mukmin tamong Syeuruga
دالم لذاه سنتوك ماڠت چاتى رسا
Dalam lazat seuntok mangat cati rasa ككل سنن جيت هنا حد هنا هڠڬا
Keukai sinan cit hana had hana hingga
سى يڠ فاجوه فروة هن سڠكوه لم سو كأن
Soe nyang pajoh pruet han sungkoeh lam sukaan ڠن بوه كايو جيت متنتو رسا لابن
Ngon boh kayee cit meuteuntee rasa le ban
ڠن مكانن ڠن مينمن لذات ٢
Ngon makanan ngon minoman lazat-lazat سنتوك قايم لم تكهيم ٢ هاتى ماڠت
Suntok kayem lam teukhem-khem hate mangat
عمور سدوم سابن ٢ مودا بهليا
Umu sadum saban-saban muda bahliya توها هنلى سا كيت هنلى روك ٢ مسا
Tuha hanle saket hanle rok-rok masa
تتف سنن جى تبيت هن روك٢ مسا
Teutap sinan ji teubiet han rok-rok masa دسكافر دوم تڬو لير لم نر كا
Di sikaphe dum teugule lam Nuraka
كمكانن بواه زقوم ين جى فاجوه
Keu makanan buah zakom nyang ji pajoh فدوم عذاب أورى مالم هنا تدوه
Padum adeub uroe malam hana teudoh
سى يڠ فاجوه ها ڠوس توبه افوى سنرى
Soe nyang pajoh hangoh tuboeh apui sinaroe بوه زقوم ين توتڠ تهت تاجم بن دورى
Boh zakom nyan tutong that tajam ban duroe
لوم ڠن رنتى ڬبوه فاسوڠ رنتهيق رنتهوك
Lom ngon rante geuboeh pasong rinthiek-rinthuek فدوم عذاب كلا لمفن أولر فاتهوق
Padum adeub kala limpeun uleue pathuek
يڠتن توبة ين في كتوت لم نركا
Nyang tan taubat nyan pi geutot lam Nuraka أورڠ مؤمن أومة نبى يڠ مدوشا
Ureueng mukmin umat Nabi nyang meudeesya
هن جيلالو افوى نركا بك هن فاتوت
Han jilalu apui Nuraka bak han patot كيرا ٢ أوبى دوشا دومنن كتوت
Kira-kira ube deesya dumnan geutot
لدوم بتيس لدوم هابس لدوم عوه فها
Ladom beuteh ladom habeh ladom ‘oh pha
لدوم توتوڠ مڠ عوه ڬا كى عوه نن سجا
Ladom tutong meung ‘oh gaki ‘ohnan saja
تمر لدوم هابس بندوم إ لا موكا
Teuma ladom habeh bandum illa muka لدوم توتوڠ مڠ عوه تا كوى إ لا دادا
Ladom tutong meung ‘oh takue illa dada
كاوس افوى نبك ڬا كى بندوا بله
Kawoh apui nibak gaki bandua blah سنچوة ٢ عذاب فا كى ڠر لن فكه
Sineucut-neucut adeub page ngo lon peugah
تمر ڬبوه بن سوة تمر عذاب سابى
Teuma geuboeh bansot teuma adeub sabe تولڠ أوراة اسي أوتق بندوم رلى
Tuleueng urat asoe utak bandum reule
ري چيت كبيت يڠ كفڬه تافراسا
Roe cit keubit nyang geupeugah ta peurasa بتا ايمان وهى يق چوة دان هى چوة دا
Beuta Iman wahe Nyak Cut dan he Cut Da
يڠ كفڬه دهى تا كبه بك مصلا
Nyang geupeugah dhoe takeubah bak mushalla سمبهيڠ ليمڠ بى تاتڠڬل بتا جا كا
Seumbahyang limong bekta tinggai beuta jaga
( تمت والحمد لله رب العالمين)
---------------------------------
Geusalen Le Tgk TA Sakti
0 Comments